Agado de UEA dum 2017 [Attività dell’Associazione Esperantista Mondiale nel 2017]

La 6-a Afrika Kongreso de UEA

La 31-an de decembro 2016 finiĝis la 6-a Afrika Kongreso de Esperanto de UEA, kiu komenciĝis la 24-an en la tanzania urbo Bunda kun 74 partoprenantoj el 14 landoj. Krom la afrikaj landoj Burundo, DR Kongo, Kenjo, Ruando, Sud-Afriko, Tanzanio, Togolando, Zambio, estis reprezentitaj ankaŭ Brazilo, Francio, Hungario, Islando, Japanio kaj Koreio.

 (revuo Esperanto Januaro paĝoj 6-7, 38–40, 89)

Aktivejo por aktivuloj

UEA lanĉis la retejon www.aktivulo.net, kiu prezentas bazajn informojn pri pluraj aktivaĵoj. Ĝia celo estas ne nur prezenti informojn, sed ebligi komunikadon, blogon kaj aliajn interaktivajn rimedojn.

En la enira paĝo estas kolekto de ĉ. 140 komunikoj EKO, dissenditaj ĝis nun. Estas ankaŭ blogo pri agado, por ke estraranoj kaj aliaj aktivuloj povu komuniki siajn projektojn kaj atingojn kaj alvokojn. Informoj pri la AMO-programo, Jaro de la Lernanto, Ni semas kaj FLAM-analizoj.

(revuo Esperanto Februaro paĝo 37)

Gazetara kampanjo por la Zamenhof-Jaro

UEA provizis novan paĝaron www.zamenhof.life, kiu havas ampleksan enhavon pri la vivo kaj verko de Zamenhof en Esperanto kaj allogajn informojn por la ekstera publiko en pli ol 30 lingvoj.

Krom tiu plurlingva paĝaro, estas ankaŭ la paĝo www.gazetaro.org/eventoj/  por kolekti kaj montri eventojn aŭ aperintajn artikolojn pri la Zamenhof-Jaro sur mapo, kalendaro kaj blogo.

La Estraro de UEA decidis ankaŭ pri speciala gazetara kampanjo okaze de la “Zamenhof-Jaro”. La celo estas informi plejeble multajn gazetojn, radiostaciojn, televidstaciojn, retpaĝojn aŭ blogojn pri Zamenhof kaj Esperanto. Per la helpo de kunlaborantoj, la asocio sendis pli ol 3 mil mesaĝojn al komunikiloj en pluraj landoj.

(revuo Esperanto Februaro paĝoj 3, 31, 55, 112, 132 )

Amikumu

Amikumu estas nova aplikaĵo por poŝtelefonoj. La programeto faciligas interkontaktadon de homoj, kiuj parolas samajn lingvojn, montrante ilian aktualan (proksimuman) lokan distancon de la uzanto kaj donante la eblon tekste mesaĝi al ili.

UEA estas la ĉefa sponsoro de Amikumu, kiun realigas esperantista teamo sub la gvido de Chuck Smith kaj Richard Delamore.  

Ĝi estas facile rete trovebla kaj elŝutebla. Amikumu estas ekzemplo de nova iniciato sur la agadkampo Komunumo, kiu celas malfermi al esperantistoj novajn manierojn uzi la lingvon por komunaj celoj, kaj samtempe protekti kaj evoluigi niajn plej bonajn kulturajn tradiciojn.   https://amikumu.com/eo/

(revuo Esperanto Aprilo paĝoj 88, 111, 154–155, 213)

La Estraro traktis renovigojn en Roterdamo

La retejo de UEA havis gravan lokon en la tagordo de la Estrarkunsido, ĉar kreiĝis teknika teamo por zorgi pri ĝia kompleta renovigo. Tri anoj de tiu teamo, kiun gvidas Ana Ribeiro (Brazilo), venis al Roterdamo por aranĝi la lastajn detalojn de la kontrakto kaj konsiliĝi kun la Estraro pri diversaj demandoj.

Jam okazis signifa preparlaboro pri la nova datumbazo kiu fundamentos la novan sistemon, kiu integros la financan, membraran, libroservan kaj retejan administradon, ebligante pli bonkvalitajn kaj diversajn servojn al la membroj kaj ŝparante laborfortojn en la Centra Oficejo.  

(revuo Esperanto Junio paĝoj 125, 134–141, 177 )

La 46-a Malferma Tago de la Centra Oficejo

Por la 46-a fojo okazis Malferma Tago de la Centra Oficejo sabaton, la 29-an de aprilo 2017, kaj tuj poste, dimanĉe, la 30-an de aprilo, refoje okazis seminario pri informado.

La 46-a Malferma Tago estis dediĉita al la Zamenhof-Jaro: unue, tuj post la libroservaj novaĵoj prezentitaj de Ionel Oneţ, Martin Schäffer, Ĝenerala Sekretario de UEA, prezentis trarigardon pri la Zamenhof-Jaro: ĝisnunaj atingoj kaj venontaj paŝoj.

Al la Zamenhof-Jaro rilatis ankaŭ la prelego de Barbara Pietrzak, kiu, ne nur kiel komisiito de UEA pri la Zamenhof- Jaro, sed ankaŭ kiel ĵurnalisto de la Pola retRadio, regule kontribuas al la disvastigado de informoj per intervjuoj, felietonoj rilate al la Jaro.

 

 (revuo Esperanto Junio paĝoj 3, 31, 55, 112, 125, 132)

70-a IKU kaj 20-a altnivela IKU-libro kronis la sciencan programon en Seulo

Unuafoje okazinta en 1925, la Internacia Kongresa Universitato (IKU) ĉijare festis la 70-jaran jubileon. Amri Wandel, prezidanto de Akademio Internacia de la Sciencoj (AIS), prezentis koncizan historion de IKU-AIS.  

Okazis naŭ IKU-prelegoj, el kiuj kvar havis daŭrigajn prelegojn kiel kursojn de AIS. La plenaj resumoj de ĉiuj 13 prelegoj estas legeblaj ĉe: http://uea.org/teko/IKU.

Kiel en ĉiuj jaroj ekde 1997 aperis la IKU-Libro kun la tekstoj de la IKU-prelegoj kaj ĉi-jare ankaŭ resumoj de la prelegoj okazintaj kadre de la Scienca Kafejo.

(revuo Esperanto Septembro paĝoj 173, 233)

Unesko-Kuriero en Esperanto eldoniĝis

       Unesko-Kuriero estas la oficiala revuo de Unesko, kiu ekaperis en 1946. Antaŭ jaroj, multaj esperantistoj alvokis ke Unesko eldonu ĝin ankaŭ en Esperanto.

En majo 2017, post reapero de la 76-paĝa plenkolora Unesko-Kuriero en formato A4, UEA tuj lanĉis projekton pri eksperimenta eldono de Unesko-Kuriero en Esperanto, laŭ iniciato de la UEA-komitatano Trezoro Huang Yinbao, direktoro de Esperanto-Centro Ora Ponto Ĉinio.

Dank’ al kortuŝa kunlaboro de 36 tradukintoj kaj provlegintoj en 23 landoj, kaj financa subvencio de Esperanto-Centro Ora Ponto Ĉinio, la 1-a numero de Unesko-Kuriero en Esperanto estas eldonita.

   La papera versio estas aĉetebla ĉe la Libroservo de UEA. La reta versio (ISSN 2521-7364) estas senpage elŝutebla ĉe UEA-retejo:

http://uea.org/pdf/Unesko-Kuriero_1-2017.pdf

(revuo Esperanto Septembro paĝoj 63, 83, 174, 213)

Unuiĝintaj Nacioj

Cesco Reale kaj Stefano Keller, el la teamo de UEA-reprezentantoj ĉe UN en Ĝenevo, partoprenis kunsidojn de la 10-a sesio de Ekspertaj Mekanismoj pri la Rajtoj de Indiĝenaj Popoloj (EMRIP), kiu okazis en la Palaco de Nacioj inter la 10-a kaj 14-a de julio 2017.

La temoj de la evento estis: raportoj kaj studo pri la pasintaj laboroj kaj rigardo antaŭen, analizo de la situacio pri la partopreno de indiĝenoj en la UN-sistemo, prezentado de bonaj ekzemploj praktikaj, celantaj la realigon de la 10-jariĝinta Deklaracio de UN pri la Rajtoj de Indiĝenaj Popoloj.

Reale kaj Keller ekspoziciis en la kunvenejo informilojn pri Esperanto, UEA, la Zamenhof-Jaro, kaj interparolis kun indiĝenoj kaj NRO-reprezentantoj. Krome, ili esploris pri ebloj organizi paralelan eventon ĉe UN, okaze de iu simila venonta kunsido.

Legu plu:  http://www.linguistic-rights.org/eventoj

(revuo Esperanto Septembro paĝoj 176, 250)

TEFA venko

Tutmonda Esperanto-Futbala Asocio (TEFA) anoncis, ke la teamo Esperanto venkis la korean teamon Dongdaemun (1 – 0).

Tio estas la 3-a pokalo Zamenhof kaj la unua venko de la teamo Esperanto. La futbalmatĉo okazis kadre de la 102-a Universala Kongreso en Seulo.

(revuo Esperanto Septembro paĝo 175)

La 102-a Universala Kongreso en Seulo

1174 homoj el 61 landoj de ĉiuj mondopartoj venis al Seulo, Koreio, por partopreni la 102-an Universalan Kongreson, en granda kaj agrabla kongresejo. Estis multaj da ĉarmaj koncertoj preskaŭ ĉiutage.

Gravas mencii pri La Ponto-kunveno (pri unuiĝo de Koreio), kiu okazis en la Korea Parlamentejo kie ĝia vicprezidanto bonvenigis la partoprenantojn esperantistajn kaj dum kiu la oficiala lingvo estis Esperanto!

Kandellumo Verda (la kongresa ĉiutaga kuriero) lumigis la ŝanĝojn kaj donis gravajn informojn.

La urbestro de Seulo bonvenigis la kongresanojn dum la malfermo kaj amaso da Esperanto-flagoj estis en kelkaj stratoj ĉirkaŭ la Universitato de Fremdaj Studoj (HUFS), kie okazis la kongreso.

(revuo Esperanto Septembro paĝoj 171-173, 175, 178-179, 186)

Multkultura Vilaĝo Esperanto 2017

Aŭguste de 2017, estis realigita la duan fojon Multkultura Vilaĝo Esperanto dum la granda, fama festivalo Woodstock ĉe la pola/germana landlimo. Ĝia iniciatinto kaj kunordiganto estas CEM – Centro de Interkultura Edukado Nowy Sącz. La projekton monsubtenis UEA kaj bonkoruloj.

La 20-persona teamo de mateno ĝis vespero laboris por informi kaj reklami pri Esperanto. Rikolto povas esti abunda, ĉar kursoj de Esperanto, gvidataj de Stano Marĉek 3 foje ĉiutage, allogis plenajn grupojn de entuziasmuloj, kiuj dum duhoraj lecionoj prilaboris po 6-7 lecionojn!

Aldone ni kolektis deklarojn por junaj amikoj de Esperanto kaj samtempe la subskribojn por Paca Nobel-Premio al la Organizantoj de la Festivalo. La rezultoj estis – cent deklaroj de Amikoj de Esperanto kaj pli ol 2 mil subskriboj por Nobel-Premio.

(revuo Esperanto Oktobro paĝoj 202-203)

IIK Bunta kaj amikema mikso inter junuloj

       Rekorde granda estis la 46-a Internacia Infana Kongreso (IIK) en Seulo, kiu okazis paralele kun la Universala Kongreso. Ĝi altiris 66 infanojn kaj adoleskantojn el ok landoj kun 12 diversnaciaj gvidantoj.

El la 66 partoprenantoj, nur 15 venis el Esperanto-familioj kaj 51 el lernejoj: 4 ĉinaj infanoj el elementa lernejo, Baijangŝuijie, 4 koreaj infanoj el elementa lernejo, Susong, 7 japanaj adoleskantoj el la rondoj de la japana religio Oomoto kaj 36 koreaj adoleskantoj el 5 alternativaj lernejoj.

(revuo Esperanto Oktobro paĝo 204)

UEA pledas por ne-perforto

La 2-an de oktobro, Unuiĝintaj Nacioj invitas la mondon kunsoleni la Internacian Tagon de Ne-perforto. La Tago celas disvastigi konscion pri la ne-perforta vojo al solvado de konfliktoj, inspirite de la filozofio kaj persona ekzemplo de Mahatmo Gandhi, kiu nomis la ne-perforton “la plej granda potenco je la dispono de la homaro.”

En ĉi tiu tago, Universala Esperanto-Asocio deklaras sian firman subtenon por la alvoko de UN, kies aktualeco estas konfirmita ĉiutage per novaĵoj el ĉiuj kontinentoj. La principoj kaj agoj de ne-perforto respondas al la streboj de la Esperanto-movado, per la disvastigo de lingvo neŭtrale homa, kultivi pacon, toleremon kaj komprenon tutmonde. Sekve, UEA kondamnas ajnan formon de perforto, kaj substrekas ke plena respekto al la homaj rajtoj estas nemalhavebla bazo por la konstruado de kulturo orientita al paco kaj interkompreniĝo inter la popoloj.

(Gazetara Komuniko de UEA Oktobro N-ro 707)

Strategia Forumo pri Orientazia Movado kaj filmfestivalo Teo kaj Amo

La Strategia Forumo pri Orientazia Movado estas organizita de Lee Jungkee kaj ĝia celo estas kunvenigi gvidajn aktivulojn el Ĉinio, Japanio, Koreio kaj Mongolio por interŝanĝi ideojn kaj trovi novajn vojojn por la progresigo de Esperanto en Orienta, Centra kaj Suda Azio.  

Estas notinde, ke du universitatoj en Ĉinio (Universitato Kunming-a Arta Profesia kaj Universitato Laoning) interesiĝas pri fondo de Esperantocentro en siaj universitatoj.

La festivalo Teo kaj Amo estis tre bona, kun gaja kaj internacieca etoso. Ĉion gvidis denove Ĝoja (Zhang Ping) el Ĉina Radio Internacia, kun la subteno de renoma fakulino pri teo-kulturo, profesoro Wang Xufeng.

Novaĵo ĉi-foje estis la aŭspicio de la ĉefurbo de la gubernio Dushan en la sudo de la provinco Guizhou. Temas pri tre bela monteta regiono kun kelkaj lokaj indiĝenaj popoloj.

La eventojn partoprenis la prezidanto de UEA Mark Fettes kaj la estrarano Lee Jungkee.

(revuo Esperanto Decembro paĝoj 244-245)

Bona etoso, kultura bunto kaj laboremo

Sukcese okazis de la 13-a ĝis la 15-a de oktobro la 4-a SudAzia Seminario (SAS 4) en la suda parto de Barato (Hinda Unio), en la urbego Bengaluro. La seminario logis 54 partoprenantojn.

La malferma ceremonio estis mastrumata de d-ro Giridhar Rao. Salutis nome de UEA ĝia vic-prezidanto, Stefan MacGill. Temis ne nur pri saluto, sed ankaŭ agad-proponoj – tiu teksto disiris vaste per EKO-komuniko tuj post la malfermo. Salutis nome de ILEI ĝia prezidanto, s-ino Mirejo Grosjean, kiu skizis novajn evoluojn en la laboro de la instruista ligo.

En kvar grupoj oni diskutis kaj katalogis la movadajn fortojn kaj la problemojn de la regiono; poste la avantaĝojn kaj minacojn de la socio kaj la rezultojn reraportis al la pleno. La tuton reĝisoris la vicprezidanto de UEA. La rezulto de tiu analizo disiris al milo da retadresoj per EKO-komuniko du horojn post la fino de la sesio. Post la analizo, sekvu ago-proponoj.

(revuo Esperanto Decembro paĝo 246)

La 47-a Malferma Tago kaj Seminario pri Informado en la Centra Oficejo

La 47-a Malferma tago okazis la 25-an de novembro, 53 geesperantistoj el 20 landoj partoprenis. Ionel Oneţ raportis pri la plej novaj novaĵoj de la Libroservo, Roman Dobrzyński faris prelegon pri la temo “Zamenhof en Varsovio”, la prelego de sinjorino Spomenka Štimec donis fokuson al Vasilij Eroŝenko, Rakoen Maertens faris raporton pri “Agadoj ĉe Unesko”, la prelega temo de Amri Wandel estis “Kosmo kaj ni: novaj perspektivoj de vivo ekstertera” kaj la temo de Marija Belošević estis “Verkaro de Lucija Borčić”.

La volontulinoj Fériel Djenidi kaj Roxane Romann faris prelegon kun la temo “Kara Akademio,” kaj “El Brezando ĝis Samarkando”, Hoan Tran raportis pri la agadoj de TEJO, Nicoleta Enache kaj Hoan Tran raportis pri detaloj de Varbiloj en kaj pri Esperanto, kaj Lucia Li prezentis la detalojn pri ĉiutagaj laboroj, radiaj programeroj kaj kolora enhavo de la retejo de la Esperanta Redakcio de Ĉina Radio Internacia.

La sekvantan tagon okazis Seminario de Informado. Nicoleta pli profunde diskutis pri kio vere temas «informi », ĝiaj bazaj elementoj kaj pri kio informanto indas atenti dum la procezo de Informado. Kun fokusiĝo sur flugfolioj kaj faldfolioj, Roxanne donis al la aŭskultantoj interesan scion, ke desegno de varbiloj tute ne aspektas tiel simpla, kaj ŝi prezentis ekzemplojn pri tio kiel etaj desegnaĵoj povas havi grandan efikon kaj influon sur la legantoj.

Posttagmeze, la dua parto de la Seminario celas ankaŭ neesperantistojn kaj ideale tiam la CO estis tute malfermita al la publiko.

        Vi povas spekti la eventon ĉe: https://www.youtube.com/user/UEAviva/videos

(revuo Esperanto Januaro 2018 paĝo 5)

AMO restas amase amata tra 2017

Kun sama intenseco kiel en la antaŭa jaro pluiras la trejnprogramo de UEA. Temas pri Aktivula Maturigo, konata (kaj klare amata) laŭ la mallongigo AMO. Tra 2016 kaj 2017 okazis statistike unu trejnseminario ĉiumonate, pro la senĉesa deziro venanta el plej diversaj mondpartoj.

Depost la lanĉo en marto 2014, okazis laŭjare 8, 9, 12 kaj 12 seminarioj, do fine de 2017 okazis jam 41 el ili. En 2017 la programo atingis kvin novajn landojn: Baraton (Hindan Union), Kartvelion, Korean Respublikon, Rusion kaj Svislandon. La programo tuj post la lanĉo atingis ekstreman geografian varion: la unuaj kvar seminarioj okazis en Eŭropo, Norda Ameriko, Suda Ameriko kaj Azio.

Spite la malfacilan financan situacion de UEA, la programo pri trejnado eniras sian kvaran jaron kun fido pri senĉesa deziro je seminarioj, kun promeso de pliaj novaj landoj, mondpartoj kaj temo – la jaro 2018 devos enhavi la kvindekan seminarion.  

(revuo Esperanto Januaro 2018 paĝoj 6,7)

Reprezentanto de UEA alparolis la plenan sesion de la 39-a Ĝenerala Konferenco de Unesko

La 6-an de novembro 2017, reprezentanto de UEA faris triminutan paroladon antaŭ dumilo da diplomatoj, aktivuloj kaj oficistoj el la tuta mondo, en la plena sesio de la 39-a Ĝenerala Konferenco de Unesko, okazanta ĉe la sidejo de Unesko en Parizo. Nur dudeko da internaciaj neregistaraj organizaĵoj (NRO-oj) ricevis tian lokon en la tagordo.

La voĉo kaj la vizaĝo de UEA estis tiuj de Rakoen Maertens, juna aktivulo el Belgio kaj komisiito de TEJO pri agado ĉe Unesko, kiu jam akiris spertojn pri eksteraj rilatoj en pluraj internaciaj aranĝoj inkluzive, de NRO-Forumo de Unesko okazinta pasintmaje en Riado, Sauda Arabio. Subtenanta lin estis teamo konsistanta el Renée Triolle, François Lo Jacomo, Barbara Despiney, Didier Loison kaj Gilles Tabard.  Eblas spekti la paroladon ĉe https://youtu.be/BhyjClzFi3I

(revuo Esperanto Januaro 2018 paĝoj 10-13)

Unesko subtenis la klimakson de la Zamenhof-jaro

En la 11-a de decembro okazis la konferenco “Tutmondiĝo, Interreto, Unesko-Kuriero”, kun la subtemo “Kiel statas Esperanto 100 jarojn post la morto de Zamenhof?” en la monda sidejo de Unesko en Parizo en ĝia plej granda festo-salono.

En la malferma ceremonio unue salutis la estrino de la pola delegacio al Unesko, s-ino Krystyna Żurek, sekvate de Maryse Wanda Zaleski- Zamenhof, la pranepino de L.L. Zamenhof, kaj s-ro Frank La Rue, la Asista Direktoro de Unesko por Komunikado kaj Informado.

Fine salutis Stefan MacGill nome de UEA. La programon prezidis s-ino Renée Triolle kaj la tuto estis simultane interpretita inter Esperanto kaj la angla kaj la franca.  

Okazis ankaŭ aliaj gravaj paroladoj; Sebastien Moret: “Kial Esperanto venkis”. Jean-Claude Lescure: “Esperanto fronte al tutmondiĝo”. Guilherme Fians: “Esperanto nuntempe kaj fronte al sia estonto: komunumo kaj siaj komunikiloj”.   Chuck Smith: “La modernaj komunikiloj serve al Esperanto”. Trezoro Huang Yinbao: “La Unesko-Kuriero en Esperanto”. Giorgio Novello: “Ĉu nova lingvo por Unesko?”  

Por profiti la fluon de esperantistoj el diversaj landoj, Espéranto-France kaj UEA kune organizis en la antaŭa tago la 41-an AMO-seminarion, kiu unuafoje traktis temon pri la eksteraj rilatoj de UEA, unuavice la rilatoj kun Unesko.  En la tago post la konferenco okazis tre pozitiva kunsido inter Esperanta delegacio kaj la ĉefredaktorino de la Unesko-Kuriero, kiu bonvenigis la ekaperon de la Kuriero en Esperanto.

Entute, valora rekono de Unesko pri la aktiveco kaj lojaleco de la esperantistaro en la antaŭenigo de la celaro kaj principoj, kiujn dividas UEA kaj Unesko.

(revuo Esperanto Februaro 2018 paĝoj 37-39)

UN-Reprezentanto de UEA alparolis la tradukan servon de Unuiĝintaj Nacioj

La 24-an de majo la reprezentanto de UEA ĉe Unuiĝintaj Nacioj, d-ro Humphrey Tonkin, prelegis ĉe la Tradukaj Servoj de UN pri “La Graveco de Lingvoj en la Tagordo de UN”. Lia prelego emfazis, ke la oficistoj de UN, ekster la lingvaj servoj, emas subtaksi la gravecon de lingvoj ne nur ene de la strukturoj de UN sed ankaŭ en la programo de internacia evoluigo.

Li atentigis pri la fakto, ke lingvoj entute ne menciiĝas inter la 17 Celoj por Daŭripova Evoluigo, nek inter la 169 “celtabuloj” kiuj akompanas ilin.

Aliflanke, li notis, ke en UN kreskas la interesiĝo pri multlingvismo. En majo, rezolucio de la Ĝenerala Asembleo kreis novan Internacian Tagon de Tradukado, kiun oni festos ĉiujare la 30-an de septembro; kaj nova rezolucio pri multlingvismo, akceptita de la Ĝenerala Asembleo kaj baldaŭ aperonta en sia fina formo, emfazas la gravecon de dialogo en la daŭrigeblo de la agado de UN, kaj atentigas pri la valoro de scipovo kaj utiligo ankaŭ de lokaj lingvoj, aldone al la ses oficialaj lingvoj de la Ĝenerala Asembleo.

D-ro Tonkin estis invitita kiel fakulo pri lingvaj demandoj – rekono samtempe de la rolo de UEA en la stimulado de serioza kaj realisma debatado pri la lingva politiko de UN, kaj de nur flanka pritrakto de la pretendoj specife de Esperanto.

(revuo Esperanto Decembro paĝo 250)

Emilio Cid <cid.emilio@gmail.com>

Lascia un commento

Il tuo indirizzo email non sarà pubblicato. I campi obbligatori sono contrassegnati *